Despois de que técnicos municipais revisaron este martes, en compañía de persoal do Celta de Vigo, o estado da nova grada de Marcador, o alcalde en funcións, Abel Caballero, confirmou que dito graderío, o único que está pechado en Balaídos neste momento, estará «a disposición» do club no partido contra o FC Barcelona.
«A petición do Celta, esta mañá fixo unha visita técnica á grada de Marcador Centenario. Todo está ben, o Celta tenlle a súa disposición», explicou o rexedor, que tamén avanzou que os afeccionados poderán usar «os ascensores» o próximo domingo.
A entidade que preside Carlos Mouriño informou onte do seu desexo de poñer a disposición dos seus abonados as máis de 6.000 butacas desta grada no «trascendental» encontro deste domingo contra o campión de Liga, ao que necesita gañar para evitar o descenso sen depender doutros resultados.
O estreo da nova grada permitirá ampliar o aforo do estadio en 6.200 butacas, superando os 21.000 espectadores. No Celta esperan colgar o cartel de «non hai entradas», xa que cada abonado pode retirar dúas entradas por cinco euros cada unha.
