Preto de 24.000 espectadores encheron onte pola noite as bancadas de Balaídos. Entre eles, algún que outro personaxe mediático como C. Tangana, un home tan sinxelo que non parece ter a fama que a súa música lle deu. Vestido cunha camiseta do EuroCelta, co 10 ás costas e o nome de Mostovoi, o madrileño era un máis na grada de animación de Marcador.
Dende ese punto viviu a salvación do Celta co dobrete de Gabri Veiga. As cámaras enfocárono en varias ocasións. Antes do partido, xa se lle viu entre os afeccionados que recibiron ao equipo, e o propio C. Tangana publicou nas súas redes sociais un vídeo deses momentos. Seguramente podería ter ido ao palco, pero un peixe sempre quere estar na auga.
