Fran Beltrán, que logrou acurtar lixeiramente o seu período de recuperación e, en principio, poderá estar este domingo no vital encontro ante o Barcelona, compareceu ante os medios visiblemente emocionado, ante o que se xoga o seu equipo.
O centrocampista referiuse ao seu estado físico, ás portas do encontro no que se xogan a permanencia: «Síntome ben. Mentalmente mellor que fisicamente, pero síntome ben e quedan dous días para estar a tope e deixarme a vida dentro. Teño unhas ganas bárbaras de que chegue o partido».
É consciente da situación pero é optimista: «É evidente que é a última bala que temos. A xente está metida cen por cen. Temos moitas ganas de que chegue o domingo, queremos que chegue xa. Estou convencido de que faremos un bo partido e imos gañar e conseguir a permanencia».
Emociónase co apoio da afección: «Estou vendo unha cidade volcada co seu equipo, é o máis bonito que hai no fútbol. Dependermos do noso resultado, non de outros. Este partido hai que gañalo co corazón. Todos temos familiares, xente do club e de fóra que viven nos nosos resultados. Hai xente que se o equipo non está en Primeira pasa factura. Teño unha filla que é galega e non quero que o día de mañá vexa que o seu pai non puido conseguir a permanencia. Xogámolo moitísimo máis que eles. Para nós é unha final».
E recoñece que o equipo se desvinculou nestes dous últimos meses: «Relaxámonos, é evidente e non pasa nada por dicilo ao público. Despois da paragem houbo unha desconexión. Falamos, somos unha familia e estamos máis unidos que nunca. O meu compañeiro vai dar a vida por min e eu por el. Cando quixemos reaccionar, foi tarde porque os equipos de abaixo tamén gañan».</p
