O Celta afronta a segunda ‘final’ consecutiva pola permanencia despois de ver reducida a dous puntos a súa distancia cos postos de descenso. O empate dos célticos na xornada anterior fronte ao Girona resultou insuficiente debido aos triunfos de rivais directos como Valladolid ou Getafe, polo que o partido que lle espera esta tarde en Cádiz (19:00 horas, Movistar LaLiga) adquire unha importancia maiúscula se non quere xogarse todo a unha carta o domingo que ven ante o Barcelona en Balaídos.
Para a cita ante un Cádiz que persegue aos célticos con dous puntos menos na clasificación e para quen o partido de hoxe é incluso máis trascendental, Carlos Carvalhal recupera a Luca de la Torre, tras cumprir sanción por tarxetas, e confía en que Iago Aspas poida volver ao once titular mentres o moañés loita cos seus problemas case crónicos de espalda. O técnico portugués tampouco terá problemas para incluír no equipo titular a un Hugo Mallo que sofreu unha fractura do cúbito ao golpear unha vala tras o partido contra o Girona. Carvalhal levou a toda a plantilla á Tacita de Prata, incluídos aos lesionados Marchesín e Beltrán.
O perigo «coñecido» do Cádiz
Carvalhal, que confía en que o seu equipo eleve o nivel da melloría no xogo que apreciou nas dúas últimas xornadas, repetirá liña defensiva con Mallo, Aidoo, Unai Núñez e Galán, por diante dun Iván Villar que evitou a derrota ante os gerundenses cunha parada prodixiosa nos últimos minutos. Tapia, un dos que máis compromiso amosa nestas difíciles xornadas, continuará na medular, da que podería caerse un discutido Óscar Rodríguez se finalmente xoga Aspas. Veiga, Carles Pérez e De la Torre completaría a liña medular, na que tamén podería entrar o canterano Miguel Rodríguez no costado esquerdo como alternativa ao estadounidense. Larsen sería o acompañante do moañés en ataque ante un Cádiz que quere repetir o resultado que obteu a semana pasada fronte ao Valladolid (2-0).
Duelos directos para salvar un curso
Os dous goles do excéltico Theo Bongonda deron vida ao equipo que adestra Sergio González, quen seguirá apostando polo zurdo belga de orixe congolesa como interior dereito. Os gaditanos recuperan ao dianteiro hondureño ‘Choco’ Lozano, aínda que non poden contar cos centrais Víctor Chust e Fali, nin cos centrocampistas Brian Ocampo e Álex Fernández, lesionados de longa duración, nin o atacante Chris Ramos. Ao conxunto amarelo custa marcar. É o de menos pegada da categoría, co Elche, ao sumar 28 goles. O máximo goleador é Bongonda, con 4.
Por súa banda, ao Celta non se lle da ben Cádiz, onde gañou en unha ocasión en Primeira, e foi hai 35 anos. Nesta ocasión, o equipo vigués estará arroupado por varios centos de afeccionados que viaxaron en autobuses fretados polo club. Hoxe, no Novo Mirandilla, afronta a penúltima oportunidade para selar a permanencia que tivo na man hai tempo.
