O defensa Unai Núñez afirmou este xoves que para gañar ao Barcelona terán que ir «co coitelo entre os dentes» porque el non espera a un rival relaxado a pesar de que o campión de Liga non se xogará nada en Balaídos.
«É o partido máis importante da temporada. Temos que estar co coitelo entre os dentes todo o partido porque é o Barcelona e sabemos a calidade que teñen. Temos que ir a morte», destacou.
Na súa comparecencia ante os xornalistas, o exfutbolista do Athletic asegurou que a plantilla está “máis unida que nunca” para reverter a mala dinámica que atraviesan –unha vitoria nas últimas once xornadas- e evitar o descenso a Segunda División, para o que necesitan gañar sen depender de outros resultados.
«Ás malas rachas hai que lles dar a volta con traballo, sacrificio. Os últimos partidos puxéronnos as cousas do lado contrario ao que quereríamos», lembrou.
Unai Núñez dixo non sentir «a presión» do descenso a pesar de ser consciente de que están nun momento «delicado» e coma os seus compañeiros Mingueza e Renato Tapia pediu o apoio aos seus afeccionados para pechar a tempada cunha vitoria.
«Agora necesitámolos máis que nunca», admitiu Unai Núñez, que atribuíu a un «pequeno desliz» a crítica do seu compañeiro Iago Aspas á falta de calidade na plantilla.
«É un tema que xa falamos todo o equipo e estamos máis unidos que nunca. Hai que ter en conta que son palabras que saen dun xogador despois dun partido que saíu mal», explicou o central, que prefire non saber o que suceda no Real Valladolid-Getafe.
«Se nós gañamos estamos salvados. Temos que saber iso, que gañando e dando todo por este escudo imos gañar e manter ao equipo onde se merece», sentenciou.
